بعد 22 عام من انطلاقها، بش تتوقف خدمة الاتصال والمحادثات على تطبيق « Skype » في 5 ماي الجاي، حسب ما اعلنت شركة ميكروسوفت المالكة للتطبيق.
السبب الرئيسي للقرار هذا هو تفوق التطبيقات المنافسة في المدة لخرة، كيما « زووم » و »سلاك »، على « سكايب ».
قررت شركة « ميكروسوفت » زادة انها تركز جهودها على تطوير تطبيق « تيمز » الخاص بيها، وتوفر لمستخدمي سكايب الامكانية للانتقال ليه. 
قال رئيس التطبيقات والمنصات في ميكروسوفت، جيف تيبر إلي الشركة قررت غلق تطبيق سكايب بش تركز على تطوير ميزات جديدة لتطبيق تيمز من بين الميزات هذي أدوات الذكاء الاصطناعي.
واعلن إلي « تيمز » يمشي في الثنية الصحيحة وتوقع زادة إلي أدائو بش يتحسن في الفترة الجاية.
تأسس « سكايب » عام 2003 على يد مجموعة من رواد الأعمال الأوروبيين، والي كان مملوك لشركة « إيباي » في فترة من الفترات.
وفي عام 2011، اعلن رئيس ميكروسوفت برهان إلي الشركة تمكنت من انها تستحوذ على « سكايب » مقابل 8.5 مليار دولار.
الصفقة هذي تعرفت بأنها أكبر عملية استحواذ لميكروسوفت في الوقت هذاكا، وين ولا « سكايب » جزءًا أساسي من استراتيجيتها في عصر الsmartphones.
وفي ماي من العام هذا بش تتوقف خدمة سكايب حسب الي أعلنتو شركة ميكروسوفت.
من جانبو، قال المختص في شؤون التكنولوجيا هاني نوفل، إلي الذكاء الاصطناعي أطلق رصاصة الرحمة على « سكايب »، اللي كان يحتضر عندو مدة.
