في حركة غير عادية، كلية الدراسات الإسلامية والعربية في بورسعيد المصرية، إلي تابعة لجامعة الأزهر، قررت تناقش رسالة « دكتوراه » لباحثة توفات.
الكلية أعلنت أنها باش تناقش، اليوم الثلاثاء، رسالة الدكتوراه في اللغويات متاع الباحثة هانم محمود أبواليزيد محمد أبوالعزم، إلي كانت تخدم كمدرس مساعد في الكلية، و توفات في ديسمبر إلي فات.
الدكتور محمد فكري، نائب رئيس جامعة الأزهر لفرع البنات، قال إلي الموافقة على مناقشة رسالة الدكتوراه متاع الباحثة المتوفاة، جات خاطر الجامعة تحب تكرمها بعد موتها، و تدعم عايلتها، و ما تخليش رسالتها تتسرق خاصة أنها تعبت عليها برشا و خدمت عليها 4 سنين. و زادة تبين إلي الباحثة المتوفاة كملت الرسالة، و راجعتها مع الأساتذة إلي أشرفوا عليها، و كانت حاضرة باش تناقشها، أما توفات فجأة و هذا عمل صدمة للناس الكل. 
أساتذة الكلية إلي أشرفوا على الرسالة قرروا يقنعوا إدارة الكلية باش يناقشوا الرسالة، و في الأخر نجحوا في هذا، و تحدد موعد المناقشة اليوم، و الجامعة ناوية تعطي الدرجة العلمية للباحثة المرحومة، و تبعث الرسالة للجامعات الأخرى.
