شركة أمازون اللي يملكها جيف بيزوس قاعدة تحضر باش تطلق أول أقمار اصطناعية من مجموعتها اللي باش توفر خدمة الإنترنت من الفضاء، كيف شبكة « ستارلينك » اللي يملكها إيلون ماسك.
مهمة « كايبر أطلس 1 » هي إطلاق 27 قمر اصطناعي بواسطة صاروخ « أطلس 5 » اللي تابع لمجموعة « يونايتد لونش ألاينس » اللي فيها شركتي « بوينغ » و »لوكهيد مارتن ».
وحددوا نهار 9 أفريل على الساعة 4 متاع العشية، موعد إطلاق الصاروخ من قاعدة كاب كانافيرال في فلوريدا، حسب ما قالت « يونايتد لونش ألاينس ». وهي اللي كانت أطلقت نموذجين أوليين من الأقمار الاصطناعية لأمازون في خريف 2023. 
الأقمار الاصطناعية الـ27 هذي متاع مشروع « كايبر » هي أول دفعة من مجموعة باش يكون فيها أكثر من 3200 قمر اصطناعي يدوروا في المدار المنخفض، وهدفهم يوفروا خدمة الإنترنت السريع للمناطق البعيدة في العالم، كيف المناطق اللي فيها حروب وكوارث.
أمازون قالت أن خدمة الإنترنت عبر الأقمار الاصطناعية هذي باش تكون متوفرة في عام 2025. والشركة متاع الملياردير جيف بيزوس، تحب تنافس مباشرة مع مجموعة « ستارلينك » متاع إيلون ماسك.
مجموعة « ستارلينك » اللي بدات قبل سنين عندها توا أكثر من 6750 قمر اصطناعي في المدار، حسب الموقع متاعهم، وهي الشركة الرائدة في العالم في هالسوق اللي قاعد يتطور بسرعة.
